प्रतिनिधि सभा नेपालको संघीय संसदको तल्लो सदन हो। यसको मुख्य जिम्मेवारी राष्ट्रिय नीति निर्माण गर्ने, कानून तर्जु गर्ने र सरकारका कार्यहरूको निगरानी गर्नु हो। यस समितिमा सहभागीहरूले सांसद र राजनीतिक नेताको रूपमा भूमिका निर्वाह गर्नेछन्। उनीहरूले नेपालको राजनीतिक, आर्थिक र कूटनीतिक क्षेत्रका जटिल चुनौतीहरूमाथि गहन छलफल गर्नेछन्। यस समितिले नेपाली राजनीतिको वास्तविक स्वरूपलाई प्रतिविम्बित गर्नेछ, जहाँ गठबन्धन निर्माण, वार्ता, सहमति र रणनीतिक निर्णयहरूले राष्ट्रको भविष्य निर्धारण गर्दछन्।
यो समितिले सहभागीहरूलाई राष्ट्रिय तथा अन्तर्राष्ट्रिय मुद्दाहरूको गहिरो विश्लेषण गर्न, नीति निर्माण गर्न र सरकारी गतिविधिहरूको समीक्षा गर्ने चुनौती प्रदान गर्नेछ। राजनीतिक गठबन्धन, कूटनीतिक वार्ता, कानूनी सुधार र संकट व्यवस्थापनका माध्यमबाट सहभागीहरूले शासन व्यवस्थाको व्यावहारिक अनुभव प्राप्त गर्नेछन्। यहाँ सफल हुनका लागि प्रभावकारी वक्तृत्वकला मात्र पर्याप्त हुने छैन; कूटनीति, नेतृत्व क्षमता, परिस्थिति अनुकूलनशीलता र राष्ट्रिय हितका लागि सहमति निर्माण गर्ने क्षमताले पनि महत्त्वपूर्ण भूमिका खेल्नेछन्।
यस एजेन्डा अन्तर्गत नेपालमा नयाँ सरकारको गठन तथा सञ्चालनका प्राथमिकताहरू, नयाँ राष्ट्रिय बजेट निर्माणका आधार र प्राथमिक क्षेत्रहरू, हालैको बाढीबाट भएको क्षति तथा त्यसको व्यवस्थापनबारे छलफल गरिनेछ। साथै, आगामी विकास परियोजनाहरूको प्राथमिकता निर्धारण, दिगो विकास तथा वातावरणीय जोखिम न्यूनीकरणका उपायहरू र दीर्घकालीन रूपमा विपद् व्यवस्थापन गर्न विदेशी राष्ट्र तथा अन्तर्राष्ट्रिय साझेदारहरूसँग गर्न सकिने सहकार्यबारे छलफल गरिनेछ।
